تاند ( یک شنبه، د میزان ۶) د ننګرهارد کلیو بیارغونې او پراختیا ریاست مسولان وایي، چې د مرکز او ولسوالیو ۷۰ غالۍ اوبدونکو په تېره یوه میاشت ۵۵ غالي اوبدلي، چې په ټوله کې ۴۲۰ متره کېږي.
د ننګرهار د رسنیو دفتر په یوه خبرپاڼه کې د یاد ریاست د مسولانو له قوله لیکلي چې، دوی د مېرمنو کلیوالي اقتصاد د پیاوړتیا ملي پروګرام له لارې د دې ولایت په مرکز جلال اباد ښار، سره رود، کامې، روداتو، دره نور او چپرهار ولسوالیو کې ۷۰ غالۍ اوبدونکي له مارکیټ سره نښلولي دي.
د یاد ریاست د مسولانو په خبره په دې غالیوکې بېلابېل سایزونه غالۍ شاملې دي.
د سرچینې د معلوماتو له مخې په ننګرهار کې د دې پروژې د پيل راهیسې نږدې ۴۵۰۰ متره غالۍ اوبدل شوي چې، یوولس میلیونه اودوه سوه زره افغانۍ عواید ور څخه ترلاسه شوي دي.