تاند ( شنبه، د میزان ۵) د فلسطین ولسمشر محمود عباس وایي ملګري ملتونه دې په منځني ختیځ کې د یوې دایمي سولې لپاره هڅه پيل کړي.
نوموړي ویلي ملګري ملتونه باید د فلسطین د مسئلې او دغه راز په منځني ختیځ کې د دایمي سولې د راتګ لپاره یوه نړیواله غونډه جوړه کړي څو دغه ستونزه په دایمي توګه حل شي او د فلسطینیانو حقوق خوندي شي.
هغه له اسرائيلو د دوو عربي هېوادونو د اړیکو پر عادي کولو هم نیوکې کړې دي او په خبره یې دا له فلسطیني وګړو سره زیاتی دی.
د فلسطین ولسمشر محمود عباس همدا راز وایي، چې د اسرائيلو غیر قانوني اقدامات ورته د منلو نه دي او پر وړاندې به یې خپلې مبارزې ته ادامه ورکوي.