تاند، شنبه د سنبلې ۲۹مه: کندز کې دهوايي بریدونو له امله د طالبانو په ګډون ګڼو ملکي وګړو ته مرګ ژوبله اوښتې ده.
د کندز ولایت د خان اباد ولسوالۍ اوسېدونکي وايي چې ددغې ولسوالۍ په نېک پای سیمه کې هوايي بریدونه شوي، چې له امله یې د ماشومانو په ګډون ۴۱ کسانو ته مرګژوبله اوښتې ده.
د راپورونو له مخې لومړی برید د وسله والو په یوه مرکز شوی، خو چې کله د برید سیمې ته ولسي خلک ورغلي بل برید پرې شوی چې په پایله کې یې ۱۲ ملکي وګړي او ۷ تنه طالبان وژل شوي دي.
په سیمه کې عنیي شاهدانو ویلي چې په برید کې د وژل شویو سربېره د دوو طالبانو په ګډون شل کسان نور ټپیان شوي دي.
د کندز د والي ویاند پېښه تایید کړې، خو په خبره یې چې سیمه د طالبانو تر ولکې لاندې ده نو دوی یې د تلفاتو په اړه جزیات نه لري.