تاند ( چهارشنبه، د سنبلې ۲۶) د اسراییلو او دوو عربي هېوادونو ترمنځ د اړیکو د عادي کولو هوکړه په رسمي توګه په سپینه ماڼۍ کې لاسلیک شوه.
په دې اړه جوړه شوې غونډه کې د متحده عربي اماراتو او بحرین استازو له نتنیاهو او ولسمشر ټرمپ سره د اړیکو د سولې هوکړه لاسلیک کړې ده.
دغه هوکړه په سپینه ماڼۍ کې د خبریالانو پر وړاندې لاسلیک شوه او ټرمپ د خپلې وینا پرمهال دا یوه ستره لاس ته راوړنه بللې ده.
ډونالډ ټرمپ خبریالانو ته وویل د اسرائیلو او عربي هېوادونو ترمنځ د اړیکو عادي کولو لپاره پراخې هڅې شوې وې خو په خبره یې اوس دوی بریالي شول، چې دغې هوکړې ته ورسېږي.
په ورته مهال د اماراتو چارواکو هم ویلي، چې دا هوکړه به په سیمه کې د ثبات او امنیت سبب شي او هېچا ته به زیان و نه لري.