تاند ( یک شنبه، د سنبلې ۲۳) د هند دولتي چارواکي وایي، چې وسله والو طالبانو د دوی وروستی تښتول شوی انجينر تېره ورځ خوشې کړی دی.
سرچینې د خوشې شوي هندي انجينر نوم مانتو سينګهـ ښودلی خو دا چې څنګه خوشې شوی ډېر جزئيات یې نه دي ورکړي.
هندي رسنیو د یاد هېواد د چارواکو له قوله ویلي، چې یاد انجينر د هغو ۷ هندي انجينرانو له ډلې وو، چې په تېر ۲۰۱۸ کال بغلان ولایت کې طالبانو تښتولی وو.
له دې وړاندې طالبان د هند ۶ نور تښتول شوي انجینران هم خوشې کړي دي.
وروستی هندي انجينر تېره ورځ په دوحه کې د افغان او طالبانو ترمنځ د بین الافغاني خبرو اترو د پيل سره سم خوشې شوی دی.
دا په داسې حال کې ده، چې د تېرې شنبې په ورځ د افغان حکومت او وسله والو طالبانو ترمنځ بین الافغان خبرې اترې پيل شوې.
د یادې ناستې د پيل په مراسمو کې امریکا، د ملل متحد سازمان، اروپایي اتحادیې او د نړۍ بېلابېلو هېوادونو ګډون درلود او د دې خبرو د ملاتړ ترڅنګ یې د اوربند پر ټينګښت ټینګار کاوه.