تاند ( یک شنبه، د سنبلې ۲۳) د ایران د بهرنیو چارو وزارت په یوه اعلامیه کې د بین الافغاني خبرو اترو د هرکلي ترڅنګ ویلي تمه لري، چې افغانان ژر په خپلو کې هوکړې ته ورسېږي او روانه جګړه پای ته ورسيږي.
په اعلامیه کې لیکل شوي، چې دوی د سولې، په افغانستان کې د ثبات، امنیت او بهرنیو ځواکونو د مسوولانه وتلو ملاتړ کوي.
ایران وایي تمه لري، چې افغانستان ژر تر ژره د دایمي ثبات څښتن شي.
یاد هېواد په اعلامیه کې ويلي، چې ایران په دې برخه کې له دغه هېواد سره هر اړخیزو همکاریو ته ادامه ورکوي.
په اعلاميه کې د ایران د بهرنیو چارو وزارت له قوله ویل شوي، چې روانه جګړه یوازې د خبرو له لارې د حل وړ ده.
سرچینې ویلي، څومره ژر، چې خبرې پایلې ته ورسېږي دومره د افغانستان او سیمې لپاره ګټورې دي.