تاند (شنبه، د سنبلې ۱۴) راپورونه وايي، د طالبانو د قطر د دفتر مشر ملا عبدالغني برادر د پاکستان د سفر پر مهال د هلمند د نظامي شورا او یوشمیر طالب مشرانو له جدی پوښتنو سره مخامخ شوی او وضاحتونه ورڅخه غوښتل شوي دي.

په کوټه کې د طالبانو سرچینو تاند ته وویل چې د هلمند شورا غړیو له ملا برادر څخه د ملا یعقوب او خلیفه حقاني په وړاندی په تونده لهجه وپوښتل چې د کوم ضرورت پر اساس پاکستان ته راغلی؟ د پاکستان د اته کلن زندان په موده کې یې دوه ماشومان څرنګه دنیا ته راوړل؟ او تر ټولو مهم د پاکستان د آی ایس آی پخواني مشر جنرال اسد دراني ادعا کړې چی امریکا طالبانو ته د تړون پر مهال پنځه ملیون ډالر ورکړي دي.

سرچینه وايي، دغه ډول پوښتنو او تندو څرګندونو ملابرادر مجبور کړ چې پاکستان ته خپل ۵ ورځنی سفر ۱۳ ورځو ته وغځوي.

دوې ورځې وړاندې یو وخت داسې هم په کويته کې پیښ شول چې ملابرادر وویل «زه نور د قطر دفتر له مشرۍ تیر یم او په کور کښېنم.»

د سرچینو په وینا، کله چې د افغانستان ملي امنیت (استخبارات)، د برادر او طالب مشرانو له ناندریو خبر شو، د جمعې په ورځ یې قطر ته د افغانستان د مرکچي پلاوي سفر وځنډاوه.

همداراز مولوي کبیر او نورمحمد ثاقب له ملا برادر سره له کار کولو معذرت غوښتی خو ملا یعقوب او خلیفه سراج الدین حقانی یې د رضا کولو هڅې کوي.

د ناندریو په اوج کې د طالبانو مشر شیخ هبت الله امر وکړ چی دا حساس وخت د دې ډول شکایتونو نه دی، ملا برادر دې قطر ته ستون شي خو په مرکچي پلاوي کې به مداخله نه کوي او د برادر په اړه د هلمند د شورا شکایتونه به په لوړه کچه څیړل کیږي.

https://taand.net/%d8%af-%d8%a2%db%8c-%d8%a7%db%8c%d8%b3-%d8%a2%db%8c-%d9%be%d8%ae%d9%88%d8%a7%d9%86%db%8c-%d9%85%d8%b4%d8%b1-%d9%88%d8%a7%d9%8a%d9%8a%d8%8c-%d8%af-%d8%a7%d9%81%d8%ba%d8%a7%d9%86%d8%b3%d8%aa%d8%a7%d9%86/?fbclid=IwAR1_HZLzjlbGDEV7H9wiMD-VpL4xn7tEYGM0nFl5daXQX8Sp_dT1Ellm7AY

په همدې حال کې په قطر کې د طالبانو د سیاسي دفتر ویاند سهیل شاهین له رسنیو سره په خبرو کې ویلي، د طالبانو مذاکراتي ټیم د ملا برادر په مشرۍ له پاکستان قطر ته رسېدلي دي.

نوموړي ویلي، دوی هڅه کوي چې ځينې رامنځته شوې تخنیکي ستونزې له منځه یوسي او د بین الافغاني مذاکراتو د پیل نېټه اعلان کړي.

تر دې وړاندې افغان حکومت د بین الافغاني مذاکراتو د ځنډ لامل د طالبانو د مرکچي پلاوي نه چمتووالی ښودلی و.