تاند، جمعه د سنبلې ۱۴مه: تېره ورځ ناوخته د ولسمشر غني په مشرۍ په ارګ کې د کابینې غونډه جوړه شوه.
په دغه تر سره شوې غونډه کې ولسمشر غني ویلي د سولې خبرو پر وړاندې ټول خنډونه لرې شوي او د افغانستان حکومت مذاکره کوونکي پلاوي ډاډ ورکړی چې د سولې مذاکرات به ژر پیل شي.
ښاغليغني دکابینې غونډې ته په خپله وینا کې ویلي سوله د افغانستان د خلکو او حکومت مهمه غوښتنه ده او دی خوښي یې ښودلې چې دسولې هڅې یو مهم پړاو ته رسېدلې دي.
په یاده غونډه کې چې دوالیانو هم د وېډیو کنفرانیس له لارې برخه لرله، په تذکره کې د مور د نوم درجولو په ګډون یو شمېر طرحې تایید او تصویب کړې او د یو شمېر نورو وړاندې شویو طرحو په اړه یې اړوندو دولتي ارګانونو ته مشخصې دندې وسپارل شوې.
باید وویل شي چې دوه ورځې وړاندې له طالبانو سره د خبرو لپاره د حکومت مرکچي پلاوي سره خبرو کې ولسمشر غني ویلي وو، چې د افغانستان د خلکو هیله ده چې د سولې په خبرو کې د تاوتریخوالي پر کموالي او دایمي اوربند هوکړه وشي.