هغه یو وچ کلک کلیوال ملا و. کله چې طالبانو اسلامي امارت جوړ کړ، نوموړی د عدليې وزير وټاکل شو. د عدليې وزارت اهميت ته په کتو د ډېرو صلاحيتونو او اختياراتو په کارولو سره يې د خپلو افغانانو تحقیر او تعذیب پیل کړ.

یو ځل د خپل موټروان سره د وزارته راووت. په اریانا څلورلارې کې يې موټړ ودراوو. یوه میرمن يې په دې جرم ووهله چې ترابي يې مخ ليدلې و.

دویمه ورځ چې وزارت ته راغی د مجلس له پيل وړاندې يې رئيسانو او د مجلس ګډونوالو ته وویل: تاسو به پرون له يوې کابلۍ سره زما جنګ نه وي لیدلی؟

ترابي یو متشدد کلیوال ملا و، ډیرو نرم مزاجه طالبانو ترابي ته ”د امارت او عامو افغانانو د اړیکو خرابولو وزیر“لقب ورکړی و.

د طالبانو د سقوط نه وروسته ملا ترابي د پاکستان لخوا ونیول شو او بیا د ولسمشر کرزي په غوښتنه ازاد شو.

ملا ترابي د پاکستان له زندانه تر خلاصون وروسته بيا د پاکستان د جنرالانو یار شو او په کراچۍ ښار کې يې لنګر او مهمانخانه فعاله شوه.

ملا ترابي اخند په زندان کې د غاښونو د توریدو په مرض اخته شو او غاښونه یی دومره خراب شول چې اکثره به يې غاښونه په څادر پټول.

تېره میاشت کراچۍ کې د نوموړي کور کې مجلس ګرم و. یو مولوي صاحب ترابي ته وویل: ترابي صاحب دا غاښونه دې ډیر سپین کړي دي. دا کوم کریم استعمالوې؟.

ملا ترابي ورته وويل: د ای ایس ای کريم. په مجلس کی چوپتیا خپره شوه. ملا ترابي په خندا شو. ویل یو د ای ایس ای جنرال حسن ته مې ګیله وکړه چې بندي مو کړم او غاښونه مو را خراب کړل.

جنرال د پاکستان یو فوځي روغتون CMH ته معرفي کړم. هغوی غاښونه راجوړ او سپین کړل. مولوي صاحب نور هم په خندا شو ویل دا زما د ”ای ایس ای“ سپین غاښونه دي.

مجلس کی ناست بل د طالبانو وزیر ملا عباس اخند (عباس ستانکزی نه) وویل: والله ما هم د ای ایس ای لخوا څلور حجونه کړي دي. زه هم کله کله چاته ووایم حاجي ای ایس ای خبرې کوم.

مجلس ټول په خندا شو. ما د ځان سره وویل طالبانو چې غاښونه مو تور لینګیان در سپینوي او عبادتونه مو د پنجابیانو لخوا ترسره کیږي د افغانستان دې نو خدای حافظ او ناصر شي.