تاند، دوشنبه د سنبلې ۱۰: نن د افغانستان او پاکستان تر منځ په کابل کې پر کاري پلان دویمه کلنۍ غونډه تر سره کېږي.
د افغانستان د بهرنیو چارو وزارت په یوه خبرپاڼه کې ویلي چې د یادې غونډې لپاره په کابل کې بشپړ تیاری نیول شوی دی.
د بهرنیو چارو وزارت وايي په دغې غونډه کې به ددواړو هېوادونو ترمنځ د سولې، امنیت، دوه اړخیزو اړیکو او ځیني نورو مواردو په هکله خبرې وشي.
سرچینه کاږي چې په دې غونډه کې د دواړو هېوادونو لوړپوړي چارواکي ګډون کوي او دواړه لوري به پر عمل پلان بحثونه وکړي.
تر دې وړاندې پاکستاني رسنیو ددغه هېواد د بهرنیو چارو وزارت په حواله خبر ورکړی وو چې په دغه دوه اړخیزه دویمه کلنۍ غونډه کې به د اړیکو پر لا پراختیا او سوداګریزو مسایلو خبرې کېږي.
دغه غونډه د لومړي ځل لپاره په ۲۰۱۸ کال کې د پاکستان او افغانستان تر منځ د دوه اړخیزو همکاریو او ثبات لپاره رامنځته شوه.