تاند(شنبه، د سنبلې ۸) د هلمند ولایت د کرنې ریاست وایي چې د دې ولایت په نادعلي ولسوالۍ کې ۵۰ بېوزله مېرمنو ته د کار زمینه برابروي.
دهلمند د کرنې رییس زلمی الکو وایي، چې د نادعلي په ولسوالۍ کې ۵۰ بېوزله مېرمنې د سبو او مېوو د پروسس په برخه کې روزل شوې دي، چې ډېر ژر به پر یادو مېرمنو د سبو او مېوو د پروسس اړونده توکي هم ووېشل شي، ترڅو دوی په خپلو کورونو کې په کار بوختې شي او د خپلې کورنۍ اړتیاوې ورڅخه پوره کړي.
نوموړی وایي، دغه برنامه د کرنې ریاست اړوند د کورني اقتصاد پراختیا پروژې له لوري په لاره اچول شوې، چې تر ډېره بې وسه، ناداره او اړمنې کورنۍ پکي په پام کې نیول شوي دي.
الکو وایي، د هلمند دکرنې ریاست په دې ولایت کې مېرمنو ته د کارموندنې په موخه د نورو فعالیتونو ترڅنګ د کورنیو بڼګیو او نوي بڼونو د جوړولو په برخه کې هم کار کوي او په خبره یې ددغو پروژو د پلي کولو موخه په دې ولایت کې، د سبو او مېوو د پروسس دودول، د کورنیو باغچو وده او پراختیا او د بېوزلو کورنیو اقتصادي ملاتړ دی.
د یادونې ده، چې موده مخکې د هلمند ولایت په مرکز لښکرګاه او ناوې ولسوالۍ کې هم ۳۰۰ بېوزلو مېرمنو ته د کارزمینه برابره شوې وه.