تاند، شنبه د سنبلې ۸: پېښو ته د رسېدو په چارو کې د دولت وزیر غلام بهاوالدین جیلاني میدان وردکو ولایت ته تللی دی.
یاد وزارت په یوه خبرپاڼه کې میدان وردکو ته د غلام بهاوالدین جیلاني د سفر موخه ددغه ولایت له ځايي چارواکو او د وروستیو سېلابونو له امله له زیامنو شویو خلکو سره لیده کاته بللي دي.
ښاغلي جیلاني ویلي چې دی به په میدان وردکو کې د سیلاب ځپلو وضعیت وارزوي، د مرستې وېشلو بهېر به څاري او له ځپلو شویو سیمو څخه به کتنه وکړي.
د سرچینې په خبره پېښو ته د رسېدو په چارو کې د دولت وزیر به خلکو ته بشري مرستې هم ورسوي.
په ورته وخت کې هغه په میدان وردک ولایت کې پېښو سره د مبارزې دولتي کمېسیون په غونډه وویل چې، ۵۰۰۰ کورنیو ته د خوراکي توکو, ۲۰۰ کورنیو ته غیر خوراکي توکو او ۱۰ میلیونه افغانۍ لېږدولو لړۍ د سیلاب له امله زیانمن شوو ته د رسېدو په پار په دی ولایت کې پیل شوه.
باید وویل شي چې وروستیو سېلابونو د هېواد له نورو ولایتونو سربېره په وردکو کې هم خلکو ته ګڼ ځاني او مالي زیانونه اړولي دي.