تاند، شنبه د سنبلې ۸: د پلټنې ملي اداره وايي تر اوسه یې هغه ۳۰ دوسیې لویې څارنوالۍ ته استولي چې د فساد اړوند وې.
د پلټنې ادارې رئیس محمد نعیم حقمل وايي، دوی د فساد اړوند خپلو پلټنو ته دوام ورکوي او د روان کال له پیله یې تر دې دمه د یو شمېر ادارو د وزیرانو، والیانو، سلاکارانو او ځینو نورو لوړپوړو چارواکو په ګډون دېرش کسان لویې څارنوالۍ ته ورپېژندلي دي.
د یادې ادارې مشر، حقمل ددغو کسانو نومونه نه دي په ډاګه کړي.
که څه هم ولسمشر د پلټنې ادارې د ظرفیت لوړولو ژمنه کړې، خو ددې ادارې مسؤلان بیا وايي چې د کدرونو له کمښت سره مخامخ دي او د پلټنې په برخه کې یاده اداره مسلکي کدرونه نه لري.
د پلټنې ادارې مشر ښاغلی حقمل په دې هکله وايي چې د افغانستان په پوهنتونونو کې په دې اړه د تدریس امکانات نه شته نو ځکه دوی له ستونزو سره لاس او ګریوان دي.
دا په داسې حال کې ده چې دې ادارې په دې وروستیو کې د یو شمېر لوړپوړو چارواکو په ګډون د ځینو ادارو مشران او کارکوونکي د فساد په تور لویې څارنوالۍ ته ور معرفي کړي دي.