تاند(جمعه، د سنبلې ۷) د پاکستان رسنۍ خبر ورکوي چې له درې ورځو باران وروسته د کراچۍ ښار په ګډون یو شمېر نور ښارونو ته سخت زیانونه اړولي دي.
په ورته وخت کې د کراچۍ پولیس وایي چې د باران له کبله اکثره لارې د اوبو له کبله بندې شوې دي او اوس خلک له ګڼو ستونزو سره مخ دي.
ښاریان بیا د پاکستان د حکومت پر بې غورۍ نېوکه کوي او وایي سره له دې چې دوی د بارانونو له اټکل خبر و، خو بیا یې هم د پام وړ اقدامات نه دي کړي.
پر خواله رسنیو داسې ویډیو کلیپونه لاس پر لاس کېږي چې موټرې او لوی کانټېنرونه اوبو په مخه کړي دي او خلک د خپلو ځانونو د ژغورلو هڅه کوي.
ویل کېږی له تېرو ۹۰ کلونو راهیسی دومره سخت باران نه و شوی خلک وایي چې په لرو پرتو سیمو کې زیانونه ډېر دي.
دا په داسې حال کې ده چې د بارانونو له امله د افغانستان په ډیری ولایتونو کې هم سیلابونه راوتلې چې، ګڼو خلکو ته یې مالي او ځاني زیانونه اړولې دي.