تاند، پنجشنبه د سنبلې ۶: د ملي امنیت سلاکار حمدالله محب په کابل کې د اسټرالیا له سفیر جیف توت سره ټیلفوني خبرې کړي.
د ملي امینت شورا سلاکار حمدالله محب ویلي، له اسټرالیا سره خپلو دوه اړخیزو اړیکو ته د ارزښت په سترګه ګوري.
حمدالله محب زیاته کړې، افغانستان له اسټرالیا سره د طالب بندیانو د خلاصون په ګډون په ټولو موضوعاتو کې دوه اړخیزو همکاریو ته ژمن دی.
په دغه ټیلفوني خبرو کې د اسټرالیا سفیر هم څرګنده کړې چې هېواد یې په پورته ټولو ذکر شویو مواردو کې د افغانستان دولت سره ګډو همکاریو ته لومړیتوب ورکوي.
په ورته مهال حمدالله محب په کابل کې د انګلستان له سفیرې سره له نږدې کتلي دي.
د ملي امنیت شورا له دفتر څخه په خپره شوې خبرپاڼه کې ویل شوي چې حمدالله محب په کابل کې د انګلیستان هېواد له سفیرې الیسن بلیک سره د دوه اړخیزو اړیکو پر پراختیا خبرې کړي دي.
سرچینه کاږي دواړه لوري د عمومي وضعیت تر څنګ د سولې د مخامخ خبرو د پیل او د سولې پروسې د هڅو د پرمختګ په اړه هم غږېدلي دي.
په دې ناسته کې دواړو خواوو هوکړه کړې چې د طالبانو له خوا روان تاوتریخوالی ورته د منلو وړ نه دی.