تاند، چهارشبنه د سنبلې ۵: د میدان وردک ځايي چارواکي وايي تېره شپه ددغه ولایت د جلرېز ولسوالۍ په څو کلیو کې سېلابونه راوتلي چې خلکو ته یې زیانونه اړولي دي.
د چارواکو په وینا تر اوسه د سېلابونو راوتلو پېښه کې د ښځو او ماشومانو په ګډون پینځه کسان مړه شوي دي.
د میدان وردکو د ولایتي شورا مرستیال شریف الله هوتک وايي یاد بارانونه پرون د مازیګر له څلورو بجو پیل شوي چې د شپې تر ناوخته يې دوام وکړ.
نوموړی زیاتوي تر ټولو زیات زیانونه د ذيولايت، زيمنيو، علي خيلو، قول بوتون او د کاسان سیمې اوسیدونکو ته اوښتي دي.
هغه په خپله خبرو کې ویلي، حکومت تر اوسه د پېښې له قربانیانو سره لازمې مرستې نه دي تر سر کړي.
اخوا د هوا پېژندنې ادارې د افغانستان د ختیځ په ګډون په یو شمېر ولایتونو کې د سختو اورښتونو او سېلابونو د راوتلو خبر ورکړی دی.
په ورته وخت کې د نورستان په مرکز پارون او دغه راز د کابل – جلال اباد او کابل – ګردېز لویو لارو په ګډون د هیواد په ځینو نورو سیمو کې هم د سېلابونو راوتو له امله زیانونه اوښتي دي.
د یو بل خبر له مخې نن سهار وخته د پروان مرکز چاریکار ښار کې سېلابونه راوتلي او په لسګونه کسان یې مړه او ټپيان کړي دي.
https://taand.net/%d9%be%d8%b1%d9%88%d8%a7%d9%86-%da%a9%db%90-%d8%af-%d8%b3%d8%ae%d8%aa%d9%88-%d8%b3%db%90%d9%84%d8%a7%d8%a8%d9%88%d9%86%d9%88-%d9%84%d9%87-%d8%a7%d9%85%d9%84%d9%87-%d8%aa%d8%b1-%d8%a7%d9%88%d8%b3%d9%87/