تاند ( چهارشنبه، د سنبلې ۵) د ننګرهار ولایت روداتو ولسوالۍ په حصارک سیمه کې د زیاتو ورښتونو له امله نن سهار د یوه کور دیوال غورځېدلی دی.

د ولایت ویاند عطالله خوږیاڼی وایي په دې پېښه کې د یوې کورنۍ ۶ غړو ته مرګ ژوبله اوښتې ده.

نوموړی وایي، د دیوال غورځېدو له امله د هغې کورنۍ ۲ تنه مړه شوي او ۴ نور یې ټپیان دي، چې په خبره یې د دوو ټپیانو وضعیت د اندېښنې وړ دی.

هغه وایي په ټپیانو او مړو کې میرمنې او ماشومان هم شامل دي.

دغه راز د یوه بل خبر له مخې په بټي کوټ ولسوالۍ کې د یوې ترافیکې پېښې له امله درې تنه ټپیان شوي دي.

خوږیاڼی زیاتوي پېښه د موټر چلوونکي د بې احتیاطۍ له امله رامنځته شوې ده.

دا په داسې حال کې ده، چې په دې وروستیو څو ورځو کې د هېواد په بیلابیلو ولایتونو کې د زیاتو ورښتونو له امله زورور سیلابونه راوتلي او خلکو ته مالي او ځاني زیانونه اړولي دي.

https://taand.net/%d9%be%d8%b1%d9%88%d8%a7%d9%86-%da%a9%db%90-%d8%af-%d8%b3%d8%ae%d8%aa%d9%88-%d8%b3%db%90%d9%84%d8%a7%d8%a8%d9%88%d9%86%d9%88-%d9%84%d9%87-%d8%a7%d9%85%d9%84%d9%87-%d8%aa%d8%b1-%d8%a7%d9%88%d8%b3%d9%87/