تاند، یکشنبه د سنبلې ۲: د ملي دفاع وزارت وايي د کابل په شکردرې ولسوالۍ کې یې د امنیتي ځواکونو په ګډو عملیاتو کې د طالبانو یو سرګروپ نیولی دی.
د دفاع وزارت په خبرپاڼه کې راغلي چې امنیتي ځواکونو تېره شپه د کابل شکردرې ولسوالۍ په صالح خیلي او بویه زار کلیو کې ګډ عملیات تر سره کړل، چې په پایله کې یې د یادې ډلې دغه سرګروپ ملا اختر د عبدالمنان زوی ونیول شو.
خبرپاڼه زیاتوي: «نوموړي د شکر درې ولسوالۍ په وروستيو ويجاړيو او ترهګريزو کړنو کې لاس درلود او د شکر درې له اوسيدونکو يي باج اخسته.»
باید وویل شي چې یوه اونۍ مخکې دفاع وزارت د شکردرې ولسوالۍ له طالبانو څخه د بشپړ پاکوالي خبر ورکړ.
یاد وزارت په یوه خبرپاڼه کې ویلي وو چې د امنیتي ځواکونو په ګډو عملیاتو کې یې ددې ولسوالۍ ټول کلي د طالبانو له حضور څخه پاک کړي دي.
طالبانو تر اوسه په دې هکله څه نه دي ویلي.