تاند، پنجشنبه، د اسد ۳۰مه: د بادغیس د قلعه نو ځیني اوسېدونکي د دغه ولایت د ولایتي شورا له وکیلانو او د ولسي جرګې د غړو په همغږي یاد ولایت ته د نوي والي له معرفي کېدو سره مخالفت ښودلی دی.
دوی د بادغیس په ملکي هوايي ډګر کې په اعتراض سره ګواښ کړی چې د نوي والي حاجي جمعه ګل همت الوتکې ته به په دغه میدان کې د کیناستو اجازه ورنکړي.
د بادغیس د ولایتي شورا غړی ناصر نظري وايي، دوی د دې لپاره لاریون کړی چې ددې ولایت اوسېدونکي نه په بادغیس او نه هم په مرکزي حکومت کې په لوړ پوستونو مقرر شوي دي.
ښاغلي نظري ټینګار وکړ تر هغه چې د بادغیس خلک په نورو ولایتونو کې په کلیدي پوسټونو مقرر نشي هېچاته په بادغیس کې د کار کولو اجازه نه ورکوي.
نوموړي په مرکزي حکومت غږ وکړ چې ددغه ولایت کدرونو ته دې په مرکزي حکومت او نورو ولایتونو کې د کار کولو موقع ورکړل شي او په لوړو پوسټونو دې وګمارل شي.
په بادغیس کې د مدني فعالانو له ډلې یو تن جنید الله اشکاني وايي، له پرون راهیسې د ولایتي شورا او د ولسي جرګې استازو پریکړه کړې چې نوي والي او د هغه مرستیال ته به په دې ولایت کې د کار کولو اجازه نه ورکوي.
په ورته وخت کې د بادغیس د ولایتي شورا وکیل فرید اخیزي ویلي، دوی به تر هغو خپلو اعتراضونو ته دوام ورکړي څو چې د دغه ولایت سرپرست والي له خپلې دندې استعفا نه وي کړې.
حکومت تر اوسه په دې هکله څه نه دي ویلي.
ګومان کوم چې بادغیسیانو د ټالبانو د منځنیو پېړیو حکومتولي ته زړه ښه کړی دی.