تاند، پنجشنبه، د اسد ۳۰مه: که د افغانانو تر منځ خپلمنځي خبرې کومې مثبتې پایلې ته ونه رسېږي امریکا د افغانستان د حکومت ملاتړ ته دوام ورکوي.
په کابل کې د امریکا یوه پخواني سفیر رونالډ نیومن د امریکا او طالبانو تر منځ شوې هوکړې ته په اشارې سره ویلي، په دې سره د امریکا او افغانستان تر منځ امنیتي تړون ته هېڅ زیان نه رسېږي.
د ښاغلي نیومن په خبره که طالبان د شوې هوکړې په اساس د افغانستان حکومت په رسمیت ونه پېژني او د افغانانو تر منځ خبرې ناکامې او کومې مثبتې پایلې ته ونه رسېږي، په هغه صورت کې به هم امریکا د افغانستان له حکومت ملاتړ کوي.
نوموړی دغه راز زیاته کړې، د امریکا کانګرس، کابینه او ټول حکومت ددې خلاف دي چې په افغانستان کې دې اسلامي امارت قایم شي.
د هغه په خبره دوی د افغانستان حکومت ته د یوه ستراتېژیک ملګري په نظر ګوري.
رولانډ نیومن هم د بین الافغاني مذاکراتو د ژر پیلېدو او د روانې جګړې د پای ته رسېدو هېله څرګنده کړې ده.
خو طالبانو د بین الافغاني خبرو د پیل لپاره د ۴۰۰ طالب بندیانو خلاصون شرط ایښی دی.
حکومت د ۴۰۰ طالب بندیانو له ډلې یواځې ۸۰ کسان خوشې کړي او د پاتې ۳۲۰ تنه بندیانو د خلاصون لړۍ د یو شمېر هېوادونو د ملاحظاتو له امله ځنډېدلې ده.