تاند، چهارشنبه، د اسد ۲۹مه: د غزني ولایت سیمه ییز چارواکي تاییدوي چې په دغه ولایت کې د پولیسو د ځانګړي قطعې د ښوونې او روزنې آمر فیروز احمد له طالبانو سره د یوې نښتې پر مهال وژل شوی دی.
د غزني د والي ویاند واحدالله جمعه زاده وايي، دا پېښه پرون سه شنبه د غزني ښار په مربوطاتو کې د ارزو په کلي کې رامنځته شوې ده.
نوموړی زیاتوي په دغه نښته کې طالب جنګیالیو ته مرګژوبله اوښتې خو تر اوسه یې کره شمېره نه ده معلومه شوې.
طالبانو تر اوسه په دې اړه څه نه دي ویلي.
غزني د هېواد په سویل کې یو له نا امنو ولایتونو څخه دی چې د ښار په ګډون یې په یو شمېر نورو سیمو کې طالبان په پراخه کچه فعالیتونه کوي.