خبریال: رفيع الله مندوخېل، اسلام اباد
په بلوچستان ايالت کې، چې له روغتيايي پلوه شاته پاته ايالت دی، نن د دوشنبې په ورځ د پوليو يا ګوزڼ ضد د واکسيناسيون پنځه ورځنی کمپاين پيل شوی، چې له مخې به يې د ايالت له دري دېرش ولسواليو څخه په پنځه ويشت ولسواليو کې د واکسيناسيون کمپاين ترسره شي او د کمپاين په ترڅ کې به په پنډغالو کې مېشت د افغان کډوال ماشومانو په شمول تر دوه ميليونه زيات ماشومان واکسين شي.
په کوټه کې د بلوچستان د روغتيا څانګې چارواکي وايي، چې د کمپاين په ترڅ کې به شاوخوا يويشت لکه داسي ماشومان چې عمرونه يې تر پنځو کلونو پوري وي، د ناروغۍ ضد څاڅکي ورکول کېږي.
په بلوچستان کې اوسنی کمپاين په داسي حال کې پيل شوی، چې په پاکستان کې په تېرو څو مياشتو کې د کورونا ويروس د خپرېدو له امله د ګوزڼ ضد د واکسيناسيون کمپاينونه ځنډول شوي وو. خو د روغتيا مرکزي وزارت تېری اوونۍ اعلان کړی و، چې په ټول هيواد کې به د پايتخت اسلام اباد، ازاد کشمير، ګلګت بلتسان په شمول په ټولو څلور ايالتونو کې به د واکسيناسيون کمپاين ترسره کېږي.
په بلوچستان کې د کمپاين لپاره زرګونه ګرځنډه روغتيايي ټيمونه او واکسيناتوران په دنده ګمارل شوي، څو د ايالت په ښاري او کليوالو سيمو کې ماشومانو ته څاڅکي ورکړي.
په بلوچستان او کشمير کې کمپاين نن پيل شوی، خو په پنجاب او سند ايالتونو کې د روانې اګست مياشتې له پنځلسمې نېټې او په خيبرپښتونخوا ايالت کې له ديارلسمې نېټې پيل شوی دی. د کمپاين په ترڅ کې په پاکستان کې څلوردېرش ميليونه ماشومان د فلج کوونکې ناروغۍ پر ضد واکسين کېږي. په روان کال کې په پاکستان کې د پوليو څلورشپېته مثبتې پېښې ثبت شوې دي.
د ماشومانو نړيوال صندوق يونيسيف وايي، چې په دې هيواد کې د کمپاينونو د ځنډ له امله شاوخوا پنځوس ميليونه ماشومان د ناروغۍ ضد له څاڅکو ورکولو برخې شوې دي. په پاکستان کې په تېرو کلونو کې پر روغتيايي ډلو په وار وار د وسله والو له لوري بريدونه شوي او په قبايلي سيمو کې بيا د وسله والو د اخطارونه له امله کمپاينونه ځنډول شوي وو.