تاند(شنبه، د اسد ۲۵) د افغانستان بشري حقونو خپلواک کمېسیون وايي چې د سولې په مذاکراتو کې د جګړې د قربانیانو د ځایګي د خوندیتوب لپاره، د دواړه لوریو د قربانیانو استازي په نېغه توګه د سولې خبرو کې شامل کړای شي.
دغه کمېسیون همدارنګه ټینګار کوي چې د لومړني غوراوي د امکان په صورت کې، باید د جګړې د قربانیانو په هکله یوه ملي مشوره جوړه وشي چې د هغوی غوښتنو ته رسېدنه وشي.
د بشري حقونو د خپلواک کمېسیون د نشراتو رییس ذبیح الله فرهنګ ویلې چې، د جګړې د قربانیانو کورنۍ دې د خپلو سترګو لیدلی حال د دواړو لورو له مرکچي پلاویو سره شریک کړي او د دوی ستونزو او درد ته باید پاملرنه وشي.
له اتلانو سره د مرستې بنسټ هم چې د دولتي ځواکونو د قربانیانو د کورنیو یو ملاتړی بنسټ دی وایي چې په بین الافغاني خبرو کې باید د افغان ځواکونو د قربانیانو د کورنیو ونډه روښانه شي.
بل خوا ولسمشر غني وایي چې په لویه جرګه کې د بندیانو د خوشي کولو پرېکړه تر ټولو لوی خطر و چې افغانانو د سولې لپاره ومانه.
ښاغلي غني منلې ده چې د دغو پنځه زره بندیانو د خوشي کېدو بیه په دې معنی ده چې پر نورو مسایلو سربېره د قربانیانو کورنۍ عدالت ته نه رسېږي.
ټاکل شوې ده چې په لنډو ورځو کې د سولې بین الافغاني خبرې په قطر کې پیل شي، خو د دغه خبرو د پیل نیټه تر اوسه معلومه نه ده.