تاند ( شنبه، د اسد ۲۵) د افغانستان د بایسکل ځغلونې فدراسیون له لورې د ملي یووالي او پخلاینې په نوم د باسیکل ځغلونې سیالۍ د ننګرهار ولایت څخه پیل شوې.
د یاد فدراسیو مسولان وایي، په دې سیالیو کې د ۱۶ ولایتونو ۱۲۰ لوبغاړو برخه اخیستې.
د افغانستان د بایسکل ځغلونې فدراسیون مشر فضل احمد فضلي وایي د دغې سیالۍ ګډونوال به په څلورو ورځو کې څلورو ولايتونو ته په ورتګ سره ۳۹۰ کيلومتره فاصله ووهي.
نوموړي وويل، چې د دې سیالیو ګډونوال به نن له ننګرهار څخه کابل، له کابل څخه کاپیسا او له کاپیسا څخه پنجشیر ته سفر وکړي.
د فضلي په خبره د یادو سیالیو په پایله کې به د سولې او پخلاینې پیغام د لیږد ترڅنګ ملي لوبډلې ته هم ۱۵ غوره لوبغاړي په نښه کړي .
د دې سیالیو ګډونوال بیا خوښ دي، چې دا ډول سیالیو زمینه ورته برابره شوې ده.
دوی دا ډول سیالۍ هېواد کې د ملي ووالي او ورورګلوۍ لپاره تر ټولو غوره لار ګڼي او له مسولینو غواړي څو دې پروسې ته همداسې دوام ورکړي.