تاند( شنبه، د اسد ۲۵) افغان ولسمشر محمد اشرف غني د حکومت د مرکچي پلاوي پرغړې فوزیه کوفي برید وغنده.
پر فوزیه کوفي تېره ورځ د کابل – پروان پر لویه لار شکر درې سیمه کې برید وشو، چې له امله یې نوموړې ټپي شوې ده.
د حکومت د مرکچي پلاوي مشرمحمد معصوم ستانکزي په یوه ټوېټ کې ویلي، چې مېرمن کوفي بېګا ماښام د کابل په قره باغ ولسوالۍ کې د نامعلومو وسله والو په برید کې ټپي شوې ده.
نوموړي په خپل ټوېټ کې د فوزیه کوفي روغتیايي وضعیت ښه ښودلی دی.
ستانکزي دغه راز ویلي، چې امنیتي ادارې د پېښې په هکله څېړنې کوي او زیاتوي، چې جزیات به یې وروسته له خلکو سره شریک کړي.
د ولسمشر غني ترڅنګ پخواني ولسمشرحامد کرزي هم پر فوزیه کوفي برید غندلی او دا برید یې د سولې ضد عمل بللی دی.
تر اوسه د دغه برید مسؤلیت چا یا کومې ډلې نه دی منلی.
پر فوزیه کوفي داسې مهال وسله وال برید کیږي، چې په دې وروستیو کې د افغان حکومت او طالبانو ترمنځ د بین الافغاني خبرو پيل ته د عامو خلکو هیلې ډیرې شوي دي.