تاند (پنجشنبه، د اسد ۲۳) ولسمشر محمد اشرف غني د اساسي قانون د ۶۴ مادې له مخې د ښځو د عالي شورا د جوړولو حکم صادر کړ.
د ولسمشرۍ ماڼۍ د چارو دفتر وايي، د دې شورا د رامنځته کولو هدف د میرمنو ځواکمنول، د ښځو د حقونو د ډاډ او ترويج لپاره د کورنیو او نړیوالو همکارانو تر منځ همغږي، پلان او د ښځو د حقونو په اړه د نړیوالو تعهداتو تعقیب او پلي کول او د فعالیتونو ارزونه ده.
په پام کې ده ولسمشر غني ددغه شورا ریاست وکړي.
د ښځو د عالي شورا دارالانشاء هم د ښځو د چارو وزارت او د ولسمشرۍ چارو ادارې ته سپارل شوې ده.
په دغه شورا کې د ۲۶ دولتي او غیر دولتي بنسټونو د استازو له جملې د ولایتونو ښځینه مرستیالانې، د ښځو د حقونو مدافعین او د مدني ټولنې استازي شتون لري.