تاند (سه شنبه، د اسد ۲۱) د کندهار په ارغستان ولسوالۍ کې په دوو جلا جلا بمي چاودنو کې لس ملکي وګړي ووژل شول.
د کندهار د امنیه قومندانۍ ویاند جمال ناصر بارکزی وايي، نن تر غرمې وروسته د ارغستان ولسوالۍ په شنه نري سیمه کې د ملکي وګړو پر ډاټسن موټر د سړک غاړې ماین چاونه کړې چې په نتیجه کې اته ملکي کسان وژل شوي دي.
د نوموړي په خبره د همدې ولسوالۍ په برج کي سیمه کې دوه نور ملکي وګړي چې پلي روان وو د سړک غاړې ماین په یوه بله چاودنه کې وژل شوي دي.
د دغو غبرګو چاودنو مسؤلیت تر اوسه چا نه دی منلی.
د یو بل خبر له مخې تېره شپه په زابل ولایت کې هغه مهال ۱۶ تنه طالبان د امنیتي ځواکونو په ځوابي بریدونو ووژل شول چې غوښتل یې د میزان ولسوالۍ پر ځینو سیمو حمله وکړي.
دفاع وزارت وايي په دغو بریدونو کې د وژل شویو سربېره ۳ تنه وسله وال طالبان ټپیان شوي او ۱۰ موټر سایکلونه یې ویجاړ شوي دي.
طالبانو دغه بریدونه په داسې مهال کړي چې تېره شپه ولسمشر غني د هغو طالب بندیانو د خلاصون حکم لاسلیک کړ، چې تر دې وړاندې یې په سختو جنايي جرمونو کې د لاس درلودلو خبرونه خپاره شوي وو.
هغه څوک چه په افغانانو رحم نلری ، د الله تعالی قهر دی پری نازل وی .