تاند (شنبه، د اسد ۱۸) د هند د هوایي شرکت یوه الوتکه، چې د عربي متحده اماراتو د دوبۍ ښار نه هند ته روانه وه، د هند په یو هوایی ډګر کې تر کیناستو وروسته دوه ټوټې شوې ده.
تر پېښې وروسته لومړیو کې د یادې پېښې د قربانیانو شمېر ۱۶ تنه ښودل شوی وو خو انډیا ټوډې راپور ورکړی دی چې د یادې پېښې د قربانیانو شمېر ۲۰ ته لوړ شوی دی.
په الوتکه کې د پیلوټانو، عملې او مسافرو په ګډون ټول ۱۹۱ کسان سپاره وو.
د هند د جنوبي کیرالا ایالتي چارواکو ویلي، چې په دې پېښه کې د الوتکې د عملې په ګډون تر ۱۲۳ ډېر کسان ټپیان شوي هم دي.
دوی وایي د پېښې د رامنځته کېدو علت څرګند نه دی خو پولیسو ویلي چې دوی په دې اړه خپلې څېړنې پیل کړې دي.
په ورته مهال ارګ هم په هند کې د مسافر وړونکې الوتکې د غورځېدو له امله خواشیني ښودلې ده.
ولسمشرۍ ماڼۍ په یوه اعلامیه کې ویلي، چې د افغانستان حکومت او خلک د هند د خلکو په غم کې ځان شریک بولي.
هند کې د الوتکې غورځېدو پېښې د قربانیانو شمېر ۲۰ کسانو ته ورسېده
