تاند، سه شنبه، د ثور ۲۳مه: د کډوالۍ نړیوال سازمان آی او ایم وايي، د ۲۰۲۰ کال له پيله تر اوسه ۲۸۰ زره افغانان له ایران او پاکستان څخه خپل هېواد ته ستانه شوي دي.
د دغه سازمان لخوا په تازه خپره شوې خبرپاڼه کې راغلي، په تېرو پنځو میاشتو کې په دقیق ډول ۲۷۸ زره افغانان له ایران څخه هیواد ته ستانه شي.
د سازمان د راپور له مخې د جنورۍ له میاشتې راهیسې تر اوسه ۱۸۰۰ افغانان له پاکستان څخه هم هېواد ته ګرځېدلي دي، خو په وینا یې چې له پاکستانه د ستنېدونکو کډوالو شمېر ځکه لږ دی چې دمارچ له دویمې نېټې راهیسې د تورخم او سپین بولدک لارې تړلې وې.
راپور همداراز وايي، له ایرانه تېره اوونۍ د راستنېدونکو کډوالو شمېر ۱۸ سلنه زیاته شوی او دلیل یې هم کورونا او اجباري اخراج ښودل شوی دی.
دا په داسې حال کې ده چې ایران د افغانانو په اجباري اخراج کې مشهور شوی هېواد دی او لس ورځې وړاندې یې ۵۷ افغانان له دې کبله شکنجه کړل او بیا یې سیند ته واچول چې ولې د ایران پر پوله د کار په نیت ور اوښتي دي؟