تاند، دوشنبه، د ثور ۲۲مه: د افغانستان د کډوالو چارو وزیر پر ایران غږ کړی چې له کابل سره دې د کارګرۍ په اړه یو تړون لاسلیک کړي.
د ایران د ایرنا اژانس د خبر له مخې سید حسین عالمي بلخي نن دوشنبه په یو تلویزوني پروګرام کې ویلي، ایران ته د قاچاقبرو لخوا په قاچاقي لارو د خلکو تګ راتګ یوه لویه ستونزه ده.
نوموړي ویلي، د دغې ستونزې د هواري اسانه لار دا ده چې تهران او کابل په ایران کې د کارګرۍ لپاره لیواله کسانو لپاره یو ګډ تړون ولري، تر څو افغانان په دغه هیواد کې د کار او دندې جواز ترلاسه کړي.
ښاغلي بلخي همدا راز ایران سره په سرحدي سیمو د انساني قاچاق د مخنیوي لپاره د افغانستان د عدلیې وزارت په چوکاټ ک ېد یو کاري کمېسیون د جوړولو غوښتنه هم وکړه: (( ایران باید له افغانستان سره د ویزو په برخه کې ستونزه حل کړي.))
نوموړي همدا راز د تېرې اوونۍ د پېښې په اړه چې ایراني ځواکونو ۵۷ افغان کارګر له شکنجې وروسته په سیند کې خوشې کړي وو، ویلي چې په دې اړه د افغان حکومت ترلاسه کړي شواهد کافي ندي او لا به هڅه وکړي چې معلومات بشپړ کړي.
دا په داسې حال کې ده چې تېره شپه د ایران د بهرنیو چارو وزیر جواد ظریف خپل افغان سیال حنیف اتمر ته تلفون کړی او د تېرې اوونۍ د خونړۍ پېښې په اړه د ګډو پلټنو وړاندیز یې ورته کړی دی.