تاند: د هند د سندرو بې تاجه پاچا اودیت ناراین ته د مرګ ګواښونه شوي دي.
ناراین د ممبۍ – امبولي امنیتي حوزې ته ورغلی او شکایت یې کړی دی چې له اپریل میاشتې راهیسې د مرګ ګواښونه راته کېږی.
د ناراین په خبره لومړی د مرګ ګواښ ورته په ټلیفون باندې د اپریل په ۶مه وشو او مقابل لوري ورته ډېرې سپکې وویلې: (( ما د هغه ټلیفون د موقعیت ځای څو وار وغوښتل چې معلوم کړم خو دا نمبر به اکثره بند و.))
نوموړی وایي، روانه میاشت بیا چې خپل کنسرټ ته یې تابیا نیوله، نو ناڅرګندې شمېرې ورته ټلیفون وکړ، مسیجونه یې هم ورته وکړل او د مرګ ګواښ یې ورته وکړ.
نوموړي له پولیسو هیله کړې چې ده ته د مرګ ګواښونه کوونکی پیدا کړي او معلومه کړي چې څه خبره ده؟