تاند (دوشنبه، د اسد ۱۳) د افغانستان ملي راډېو تلویزیون خبر ورکړی چې د ۴۰۰ طالب زندانیانو د برخلیک په اړه لویه مشورتي جرګه د اسد په ۱۷ په کابل کې دایرېږي.
ولسمشر محمد اشرف غني به په یاده مشورتي جرګه کې د ۴۰۰ طالب زندانیانو د برخلیک په اړه د خلکو له استازو سره وویني.
ولسمشر غني د اختر په لومړۍ ورځ ویلي و چې د ۴۰۰ طالب زندانیانو خوشې کولو لپاره لویه مشورتي جرګه را غواړي.
هغه وویل چې د اساسي قانون او د جزا کوډ په اساس د ۴۰۰ طالب زندانیانو د خلاصون صلاحیت نه لري او باید د هغوی په اړه لویه مشورتي جرګه پرېکړه وکړي.
د افغانستان حکومت وايي د ۵ زره طالب زندانیانو له ډلې ۵۹۲ یې په جنايي جرمونو کې ښکلیل دي.
که څه هم حکومت ویلي وو چې د ۵۹۲ بندیانو د خلاصون صلاحیت نه لري خو اوس دغه شمېره ۴۰۰ تنه ته راټيټه شوې ده.
ولسمشر غني سمنګانو ولایت ته د خپل سفر پر مهال ویلي وو که د سولې په پروسه کې ستونزې نه رامنځته کېدې، ټاکل شوې وه لویه مشورتي جرګه د سولې پروسې په پای کې دایر شوې وی.