تاند (یک شنبه، د اسد ۱۲) امریکایي رسنۍ وایي، چې ښايي تر راتلونکو میاشتو میلیونونه امریکایان د کمزوري اقتصادي وضعیت او بېکارۍ له امله بېکوره شي.
امریکايي رسنۍ وایي په امریکا کې میلیونونه کسان د کرونا ویروس د پراختیا له امله بېکاره شوي دي، چې له دې سره د کورنیو اقتصاد مخ پر ځوړ دی.
د سرچینې په خبره له همدې امله ښايي هغه کسان چې کورونه یې په کرایه یا اجاره نیولي دي بېکوره شي.
د یوې سروې له مخې تر راتلونکو دوو میاشتو ښایي ۲۳ میلیونه امریکایان بېکوره شي او د کورو خاوندان یې له خپلو کورونو وباسي.
د امریکا حکومت ددغه بحران د مدیریت لپاره پلان نه لري، خو په امریکا کې مدني فعالین وایي، چې باید د حکومت د بې کفایتۍ پر وړاندې میلیوني لاریونونه وشي او خلک دې په خپله خاوره کې د اوسېدو او خپل حق لپاره مخکې له مخکې مبارزه وکړي.