تاند (جمعه، د سرطان ۳) د سولې ولسي مجمع غړي له ولسمشر غني غواړي چې تر لوی اختر وړاندې دې طالب بندیان ازاد کړي.
دوی وايي حکومت دې د پاتې بندیانو د خلاصون پروسه کې خنډ او ځنډ نه رامنځته کوي او ژر تر ژره دې دواړه خواوې بندیان خوشې کړي.
د سولې ولسي مجمع دغه راز زیاته کړې چې د بندیانو له خلاصون سره سم به روانه افغان وژنه پای ته ورسېږي او روان تاوتریخوالی به ختم شي.
دیني عالمان له ولسمشر غني غواړي چې د بندیانو د نه خلاصون له امل د سولې پروسه په ټپه ولاړه د ه او هره ورځ لسګونه ملکیانو ته مرګژوبله اوړي.
دیني عالمان وايي له بهرنیانو د سولې د ټینګښت تمه نه لري او له افغانستان څخه وتل یې کولی شي امنیتي وضیعیت کې ښه والی رامنځته کړي.
د دوی په خبره چې بهرنیان په امن فضا کې ژوند کوي خو افغانان هره ورځ قرباني ورکوي نو پکار ده چې حکومت شرایطو ته په کتو پام وکړي او د مقابل لوري غوښتنې ومني.
دا په داسې حال کې ده چې تېره ورځ ملګرو ملتونو په یوه خپره کړې اعلامیه کې د جنګ له ښکلیو خواوو غوښتي و چې راتلونکې اونۍ دې افغانستان کې د لوی اختر په مناسبت جګړه ودروي.