تاند(جمعه، د اسد ۳) هندي چارواکي وايي چې ۱۴افغان لارۍ موټر چې د افغاني توکو څخه ډک وو د هند شمالي اتاري ایالت ته رسیدلي دي
چارواکي وایي کاروان له یوې اونۍ څخه په لږه موده کې د واګه بندر له لارې هند ته ورسید.
د هند د سوداګرۍ او صنایعو د کنفدراسیون رییس ، اشوک سټي هندوستان ټایمز ته وویل چې “په تیرو څلورو ورځو کې څوارلس ټرکونه د وچې میوې او نورو توکو څخه ډک دغه هیواد ته رسیدلي دي.”
هندوستان ته د افغاني توکو صادرات د کورونا ویروس د خپریدو له امله د څو میاشتو لپاره ودرول شول.
خو یوه اوونۍ دمخه، د پاکستان حکومت وویل چې دوی به د واګه بندر خلاص کړي ترڅو هند ته د افغاني توکو صادرات وکړي.
هندوستان ته د افغانستان د صادراتو کلنی ارزښت په ۲۰۱۸ کال کې ۷۴۰ میلیونه ډالره و.
هندوستان معمولا له افغانستان څخه وچې میوې او بوټي واردوي.