تاند(سه شنبه، د سرطان ۳۱) قمرګله چې د غور ولایت د تیورې ولسوالۍ اوسیدونکې ده، وروسته له هغې د رسنیو د خبرونو سرټکی وګرځیده چې له طالب جنګیالیو څخه یې د خپل مور او پلار د وینې بدل واخیست.
د غور ولایت دغه اوسیدونکې چې شاوخوا پنځلس کاله عمر لري، وايي وروسته له هغه یې دغه کار وکړ چې طالبانو یې مور او پلار په ډزو ووژل .
قمرګله وايي پلار یې قومي مشر او سپین ږیری مخور سړی و، نو ځکه طالبانو وواژه، نوموړې وايي پخپل دغه کار ویاړي چې د خپل مور او پلار قاتلین یې وژلي.
قمرګلې په نورو انجونو هم غږ وکړ، چې نور دې طالبانو ته د ډیرو وینو د تویدو اجازه نه ورکوي.
قمرګلې په دولت هم غږ وکړ چې دخلکو لپاره امنیت برابر کړي، د انجونو لپاره د تعلیم زمینه سازي دې وکړي، او د سیمې امنیت دې تامین کړي.
یادې پیغلې چې په خپل دغه کار ښه شهرت موندلی خلک یې اوس د امنیت لپاره اندیښنه لري.
د نجلۍ خپلوان عبدالقادر وايي چې مونږ له دولته غوښتنه لرو چې د قمرګلې امنیت ته پاملرنه وکړي.
د غور ولایت د تیوره ولسوالۍ ولسوال، محمد رفیق عالم وویل چې قمرګله او ورور یې د ولسوالۍ مرکز ته لیږلي او ټاکل شوې ده دوی فیروز کوه ته واستوي.
عالم ویلې له ولسمشر غواړو چې دې پیغلې ته د ملالۍ میډال ورکړي.
قمرګلې تیره شپه دوه طالب جنګیالي وژلي او ددې ولایت لپاره د طالبانو د استخباراتو معاون یې ټپي کړی، چې په دې میړانې سره تیره ورځ ولسمشر اشرف غني هم د یادې پیغلې میړانه وستایله.