تاند(سه شنبه، دسرطان ۳۱) د افغانستان دکلیو بیارغونې او پراختیا وزارت مسولان وایي، چې نن سه شنبه یې افغانستان کې د سړک جوړونې د ۲۲ پروژو تړونونه له خصوصي شرکتونو او پراختیایی شوراګانو سره لاسلیک کړل.
د کلیو بیارغونې او پراختیا وزیر مجیب الرحمن کریمي د دې تړونونو د لاسلیک پرمهال وویل، چې دغه پروژې د شاوخوا ۷۰۰ میلیونه افغانیو په ارزښت دي.
کریمي د دوه ملیارد افغانیو په ارزښت د شاوخوا ۱۰۰ نورو پروژو کاري راپور هم له رسنیو سره شریک کړاو زیاته یې کړه،چې پلي کول یې د افغانستان په شلو ولایتونو کې پیل شوي دي.
نوموړي زیاته کړه، چې ترټولو مهمه پروژه د پامیر بدخشان سړک جوړول دي ، چې ۶۰ کیلومتره یې د لومړي ځل لپاره جوړ شوی و، او د ۴۸کیلو متره نور سړک جوړولو تړون نن لاسلیک شو.