تاند- سپاټ لایټ د اسکر د فلمونو د جایزو د ۸۸ یمې دورې تر ټولو د غوره فلم جایزه وګټله.
دا فلم په باسټن کې د ۷۰ پادریانو له لوري له ماشومانو څخه د ناوړه جنسي استفادې او د کلیسا له لوري د دې کار د پټولو په باب دی.
خو د اسکار د مستندو فلمونو جایزه د پاکستاني دایرکترې شرمین عبید چنايي فلم (د غیرت په نوم قتل) وګاټه.
دا مستند فلم د سبا نومې اتلس کلنې نجلۍ د کیسې په اړه دی.
سبا د خپلوانو له لوري د ناموسي غیرت په نوم ویشتل کېږي او سین ته اچول کېږي خو دا نه مري مګر ځان داسي ښيي چې مړه ده.
سبا ژوندۍ پاتې کېږي، د روغتون د ډاکترانو او پولیسو په مرسته دعوه اقامه کوي، خو فشار پرې راوستل کېږي او دې ته مجبورېږي چې له دعوې لاس واخلي.
شرمین عبید چنايي د اسکر جایزې په ترلاسه کولو خوښي ښکاره کړه، ویې ویل چې د دې فلم په وجه په پاکستان کې د غیرت په نوم د قتلونو مسله راپورته شوه او دا د دې لپاره تر هر راز جایزې زیات اهمیت لري.
د ۳۷ کلنې شرمين مخکينی فلم د تيزابو د حملو د قربانيانو په اړه و او په ۲۰۱۲م کال کې يې د مستندو فلمونو تر ټولو غوره فلم جايزه تر لاسه کړې وه.
مېرمن شرمين عبېد چُنايي وويل چې د سبا کيسه يې په يوه ورځپاڼه کې لوستې وه. دې غوښتل د سبا کيسه له نړۍ سره شريکه کړي.
شرمين وايي د سبا يوازينۍ تېروتنه مينه وه او دې وروسته خپل پلار وباخښه ځکه چې د کلي د مشرانو له خوا تر فشار لاندې راغله.
شرمين وايي چې د دې فلم له لارې غواړي وښيي چې په ټولنه کې ښځې څومره د تنګ نظرۍ او نرواکۍ تر فشار لاندې وي. شرمين همداراز وايي، وروسته له دې چې د سبا پلار د پوليسو له خوا ونيول شو، دې ورسره په زندان کې ولیدل.
د دې په وينا د سبا پلار پر خپلو کړو هېڅ پښيماني نه ښودله او خبرې یې له کینې ډکې وې. ده بيا هم ويل چې دا د ده دنده وه چې خپله کورنۍ وژغوري او خپله لور په خپل لاس ووژني. ده فکر کاوه چې لور يې د خپلې خوښې په واده کولو سره خپله کورنۍ بدنامه کړه نو ځکه د هغې وژنه د توجیه وړ وه.
شرمين وايي، د سبا له پلار سره تر خبرو وروسته دا حيرانه شوه چې ښځې څومره محدود انتخابونه لري او د ښځو ژوند څومره د نورو د پرېکړو له کبله اغېزمن کېږي.
د شرمین په وینا هر کال ښځې د ناموس په نامه وژل کېږي. د دې په وينا، ډېری کسان داسې فکر لري چې ناموسي وژنې د کورنۍ مسلې دي نو ځکه بايد په ټولنه کې پرې بحث ونه شي. شرمين وايي چې دا بې رحمانه قتلونه د دود او مذهب په نامه پټېږي.
دا وايي چې د ناموسي وژنې کيسه يې ځکه په خپل فلم کې راخيستې چې په ټول هېواد کې د دې ستونزې په اړه خبرې پیل شي او د ښځو د ژغورلو نوي قوانين غوره شي.
د شرمین په وینا وروسته له دې چې د دې فلم جوړ او نندارې ته وړاندې شو، د پاکستان صدراعظم نوازشريف امر وکړ چې د ناموسي وژنو په اړه د قوانينو لايحه دې له سره تنظیم شي څو سرغړوونکو ته سزا ورکړل شي او قربانيان وژغورل شي.