تاند ( چهارشنبه، د سرطان ۱۸)کندهار کې یو شمیرځایي خبریالان وایي په شاولیکوټ ولسوالۍ کې د موټربم برید له امله درې پولیس وژل شوي او شل نور ټپیان دي.
سرچینه وایي،چې موټر بم برید نن سهار وختي د ملي اردو له موټر نه په ګټې اخیستنې د شاولیکوټ ولسوالۍ پر ودانۍ شوی.
روغتیايي سرچینې بیا وایي، چې په ټپیانو کې د درېیو وضعیت د اندېښنې وړ دی او پاتې نور یې سطحي ټپیان دي.
ځايي چارواکو په رسمي توګه په دې اړه څه نه دي ویلي او نه هم چا د برید مسوولیت منلی دی.
په دې وروستیو کې د کابل په ګډون په ولسوالیو او ولایتونو کې پر امنیتي ځواکونو بریدونه ډېرشوي دي او افغان حکومت یې د وسله والو طالبانو کار بولي.
دا بریدونه داسې مهال زور اخلي، چې هماله ورسره د سولې خبرې هم تودې روانې دي.
افغان حکومت وایي د سولې په درشل کې د وسله والو طالبانو د دغه ډول بریدونه ډیریدل سولې ته زیان رسولی شي.