خبریال: الله نظر ترین
(سه شنبه د سرطان ۱۰) د بشري حقونو د څار نړیوال سازمان د «ته د شکایت حق نه لرې» په نامه یوه راپور کې ویلي، وسله والو طالبانو د اصلاحاتو له ادعاوو سره- سره تر خپلو ولکې لاندې سیمو کې پر بشري حقونو محدودیتونه لګولي دي.
ولسي خلک وايي دوی دا توان نلري چې د طالبانو پر لګول شویو محدودیتونو انتقاد وکړي او یا یې په اړه پوښتنه مطرح کړي.
د غه راپور نن سې شنبه په ۶۹ مخونو کې خپور شو.
راپور تر ډېره د طالبانو تر ولکې لاندې سیمو کې د خلکو پر ورځني ژوند، د طالبانو له خوا پر پوهنه، معلوماتو او رسنیو ته پر لاسرسي او پر ګرځېدو راګرځېدو پر لګول شویو محدودیتو تمرکز کوي.
په راپور کې راغلي، د طالبانو تر ولکې لاندې سیمو کې له بشري حقونو د دوی پراخو سرغړونو په راتلونکې کې د سولې په هر ډول موافقه کې بشري حقونو ته د دوی د تعهد په اړه اندېښنې راولاړې کړې دي.
د بشري حقونو د څار په نړیوال سازمان کې د اسیا د څانګې مرستیالې پاتریشیا ګاسمن ویلي، «داسې ښکاري چې طالبان په پام کې لري د وېرې په خپرولو سره واکمني وکړي، بې له دې چې تر خپلې ولکې لاندې سیمو کې ولسونو ته په حساب ورکولو کې ځانونه مسؤول وګڼي.»
یاد راپور د ۲۰۱۹م کال له جنورۍ راهیسې د ۱۳۸ مرکو پر اساس په هلمند، کندوز او میدان وردک کې د طالبانو له چارواکو، قوماندانانو، جګړه مارانو، دغه راز ښوونکو، ډاکټرانو، پاخه عمر کسانو، زده کوونکیو او نورو عامو وګړیو سره ترتیب شوی دی.
ځايي اوسېدونکو د دولت تر ولکې لاندې په لرې پرتو سیمو کې هم شکایتونه کوي، چې زورواکي او ځینې محلي چارواکي یې مدني حقونو، د بیان ازادۍ او نورو اساسي حقونو ته درناوی نه کوي.
د دغه سازمان د راپور په حواله خلک مجبور دي چې د طالبانو تر کنټرول لاندې سیمو کې د هغوی قوانین او مقررات رعایت کړي.
افغان حکومت او وسله والو طالبانو تر اوسه ددغه راپور په اړه کوم غبرګون نه دی ښودلی.
الله نظر ترین