تاند، دوشنبه، د سرطان ۲ مه: لویه څارنوالي وایي، نن یې پنځه کارکوونکي د کابل په ده سبز ولسوالۍ کې د وسلوالو لخوا وژل شوي دي.
د لویې څارنوالۍ ویاند جمشید رسولي تاند ته وویل، چې یاد کسان د بګرام د عدلي مرکز کارکوونکي وو چې نن سهار ۸ بجې دندې ته د تلو پر مهال ده سبز ولسوالۍ کې د وسلوالو لخوا وژل شوي دي.
د لویې څارنوالۍ ویاند د وژل شویو کسانو د هویت په اړه څه نه وایي، خو زیاتوي دوی هلته د بندیانو د خلاصون دوسیو څیړلو لپاره مؤظف وو.
تر اوسه کومې ډلې یا کس د شوې پېښې مسؤلیت نه دی منلی.
دا په کابل کې نن دویمه خونړۍ پېښه ده چې رامځته کېږي.
نن سهارهم شاوخوا ۹ بجې وسلوالو غلو د دریمې حوزې اړوند دهمزنګ سیمه کې یو پولیس په ډزوو وواژه او یو بل یې تپي کړ.