تاند، پنجشنبه، د جوزا ۲۸مه: د افغانستان د مخابراتو او ټکنالوژۍ د تنظیم خپلواکې ادارې په لومړي ځل هېواد کې دننه په نړیوالو معیارونو برابر وینټیلاټور یاد مصنوعي تنفس ماشین جوړ کړ.
د دغې ادارې له مطبوعاتي دفتر څخه تاند ته په استولې خبرپاڼه کې راغلي، د کورونا ناروغانو ته د مصنوعي تنفس دغه جوړ شوی وینټیلاټور یې د ساینسي ابتکاراتو په لابراتوار کې چمتو شوی دی او نن یې د لیدو لپاره د اترا ادارې رئیس عمر منصور انصاري او مرستیال یې بلال هاشمي ورغلي وو.
د اترا مطبوعاتي خبرپاڼه کې راغلي، دا یې د ساینسي نوښتونو د لابراتوار لومړنۍ بریالۍ هڅه ده چې ترسره کېږي: (( د نوښتونو دغه تحقیقاتي اداره به راتلونکي کې نورې ساینسي اختراعاګانې هم وکړي او د افغانستان د ساینسي نوښتونو ملاتړ به هم کوي.))
د اترا د خبرپاڼې له مخې دا ماشین د کوویډ ۱۹ ناروغانو ته د درملنې لومړنی موډل و چې په خپل لابراتوار کې یې د ایم آی ټي له نړیوالو معیارونو سره سم تولید کړ.
افغانستان دا مهال د کورونا ناروغانو درملنې لپاره د وینټیلاټور ماشینونو لپاره شدیده اړتیا لري.
تر دې وړاندې په هرات کې هم د مصنوعي تنفس ماشینونه جوړ شوي وو، خو د روغتیا وزارت ناقص وبلل.