لیکوال: جنرال دولت وزیري
په ټوله کې د وسله والو ځواکونو دندی د دښمن څخه د خپلې خاورې ساتل او په هيواد کې د دولتي واکمنۍ ټینګول دي. د دې تر څنګ د یوه هیواد د وسله والو ځواکونو دنده د هيواد د پولو ډاډمن ساتل او د هغو نا امنیو پر ضد په کلکه مبارزه کول دي، چې د یوه هیواد ملي حاکميت او ملي ګټې تر ګواښ لاندې نیسي.
په جګړه کې د وسله والو ځواکونو ګډون او کارول باید د کاروني وروستۍ وسیله وي. ټول وخت بايد کوښښ وشي چې واکمن داسې شرایط را منځ ته کړي چې وسله وال ځواکونه د ښوونې او روزنې او د غښتلی نظامي وړتیا په خوندي کولو او ساتلو سره په مدني کارونو او په بیړني وختونو کې د خلکو سره په مرستو بوخت شي.
له دې سره وسله وال ځواکونه د خلکو باور، ملاتړ او مينه تر لاسه کوي او د هیوادنۍ دندو په تر سره کولو کې بريالي کیږي. خلک دوی د خپل ځان او د ملي حاکميت ساتندوی ګڼي.
د باوري او غښتلو وسله والو ځواکونو پرته یو هیواد د ډاډ وړ امنیت ته نه شي رسيدلاي او ټول وخت به د نورو د برید او لاسوهنې لاندې وي.
نظامي پوهان تل په دې نظر دي چې د ملي او غښتلي وسله وال پوځ پرتله به هيڅ يو هيواد په ډاډمن امن کی نه وي. هغه هیواد چې خپلې ملي لښکری او هغه زړورتيا چې د هیواد څخه د ساتنې له پاره اړینه وي ونه لري، نو ځان دې خپل بخت ته وسپاري.