تاند (سې شنبه، د لړم/ عقرب ۵ مه) د پاکستان پوځ ادعا کړې چې افغان امنیتي ځواکونو د جنوبي وزیرستان په انګور اډه سیمه کې د پاکستان پر پوځي پوستو بېدلیله ډزې کړې دي، چې په ځواب کې یې د پاکستان پوځ بریدونه کړي دي.
پاکستاني رسنیو ته پوځي سرچینو ویلي، افغان ځواکونو په افغانستان کې له سرحدي پوستو د پاکستان د سپکو او درنو وسلو ډزې کړې دي.
سرچینو ویلي، پاکستاني امنیتي ځواکونو په ځواب کې سمدستي عملیات پیل کړي او د توپونو په ګډون یې په سپکو او درنو وسلو د افغان طالبانو څو سرحدي پوستې، د هاوانونو ځایونه او دفاعي تاسیسات په نښه کړي دي.
د پاکستاني سرچینو په ادعا، د پاکستاني ځواکونو سختو ځوابي بریدونو افغان طالبان اړ کړي چې خپلې پوستې پرېږدي او وتښتي.
سرچینو زیاته کړې چې پاکستاني امنیتي ځواکونه لا هم د سرحدي سیمو بشپړ کنټرول لري او د هر ډول احتمالي برید پر وړاندې چمتو دي.
د دې خبر د خپرېدو تر شېبې پورې افغان لوري څه نه دي ویلي.