تاند (چهارشنبه، د وږي/ سنبلې ۲۵ مه) د ترکیې د استخباراتو مشر ابراهیم کالین د چهارشنبې په ورځ د افغانستان پلازمېنې کابل او کندهار ښار ته سفر کړی دی.
د ترکیې امنیتي سرچینو ویلي، کالین په کابل کې د افغانستان د استخباراتو له مشر عبدالحق وثیق سره لیدلي دي.
هغه په کابل کې د افغانستان د سرپرست حکومت د ريیس الوزرا د اقتصادي چارو له مرستیال ملا عبدالغني برادر، د دفاع وزیر محمد یعقوب مجاهد او د کورنیو چارو وزیر سراجالدین حقاني سره کتلي دي.
د دفاع وزارت وايي، سرپرست وزیر محمد یعقوب مجاهد په کابل کې د ترکیې د استخباراتو له مشر ابراهیم کالین سره په لیدنه کې د افغانستان او ترکیې د دوهاړخیزو اړیکو پر پراختیا، امنیتي مسایلو او سیمهییز ثبات خبرې کړې دي.
د دغه وزارت پر اساس، په لیدنه کې د دواړو هېوادونو ترمنځ د امنیتي او دفاعي اړیکو پر لا پیاوړتیا هم ټینګار شوی دی.
دفاع وزارت همداراز ویلي، یعقوب مجاهد په جلا لیدنه کې د قطر د ملي امنیت شورا له مرستیال حمد بن خمیس الاکبیسي سره هم په بېلابېلو برخو کې د دوستانه اړیکو پر دوام او پیاوړتیا خبرې کړي او دواړو لورو د همکاریو پر پراختیا ټینګار کړی دی.
د ترکیې د انادلو خبري اژانس د سرچینو په قول ویلي، په دغو خبرو کې د ترکیې او افغانستان ترمنځ د امنیتي او استخباراتي همکاریو د پراختیا، دوهاړخیزو اړیکو او سیمهییزو او نړیوالو تحولاتو په اړه خبرې کړي دي. .
سرچینو ویلي، د ایران په وړاندې د امریکا او اسرائیل د جګړې ترڅنګ، د ترهګرۍ، انساني قاچاق او د نشهیي توکو د قاچاق پر وړاندې د مبارزې موضوعات هم د دوی په بحثونو کې شامل موضوعات وو.
ابراهیم کالین کابل او کندهار دواړو ته تللی، خو سرچینو په کندهار کې د هغه د سفر د نورو جزییاتو په اړه څه نه دي ویلي.
ملا یعقوب د ترکیې د استخباراتو له رئیس او د قطر ملي امنیت شورا مرستیال سره کتلي – تاند