تاند/ چهارشنبه د وږي ـ سنبلې ۲۵مه/ افغانستان کې د طالبانو د حکومت د دفاع وزیر مولوي محمد یعقوب مجاهد د ترکیې د استخباراتو ادارې له رییس، ابراهیم کالن او مل پلاوي سره کتلي.
دفاع وزارت وایي، په دې کتنه کې دواړو لوریو د افغانستان او ترکیې ترمنځ د اړیکو پر پراختیا، امنیتي مسایلو او د سیمهییز امنیت او ثبات په اړه خبرې کړي.
دغه راز دواړو لوریو د کابل او انقرې ترمنځ د امنیتي او دفاعي اړیکو د لا پیاوړتیا پر اهمیت ټینګار کړی دی.
یاد وزارت په یوه بله خبرپاڼه کې ویلي چې، دفاع وزیر د قطر ملي امنیت شورا له مرستیال سره هم کتلي دي.
د دفاع وزارت په خبرپاڼه کې راغلي چې، د مولوي محمد یعقوب مجاهد او حمد بن خمیس الکبیسي ترمنځ په دې کتنه کې د دواړو هېوادونو ترمنځ په بېلابېلو برخو کې د اړیکو د ټینګښت د دوام په اړه خبرې شوې دي.
د اعلامیې پر بنسټ، په دغه کتنه کې دواړو لوریو د لا زیاتو همکاریو ډاډ ورکړی دی.