تاند (دوشنبه، د وږي/ سنبلې ۲۳ مه) په افغانستان کې د ایران سفیر علیرضا بیکدلي د ایران د رېلارو د تمویل برخې له مشر نورالله بیرونوند سره د هرات ـ مزارشریف د رېللارې د لومړۍ برخې د جوړولو د تمویل پر طرحې خبرې کړې دي.
په کابل کې د ایران سفارت د یکشنبې په ورځ په یوه خبرپاڼه کې ویلي چې د هرات ـ مزارشریف رېللار۶۵۷ کیلومتره اوږدوالی لري او د افغانستان له مهمو بنیادي پروژو څخه ګڼل کېږي.
د خبرپاڼې له مخې، دا پټلۍ به هرات د بادغیس، فاریاب او جوزجان ولایتونو له لارې له بلخ سره ونښلوي.
د ایران سفارت وايي، د دې رېللارې له جوړېدو سره به د افغانستان د لوېدیځو او شمالي ولایتونو ترمنځ د ترانسپورټي اړیکو د پیاوړتیا ترڅنګ، په دې مسیر کې د مالونو او مسافرو د لېږد زمینه هم اسانه شي.
ایران له له څو کلونو راهیسې له خپلې پولې تر هرات ښاره د رېللارې پر جوړولو بوخت دی او غواړي چې دا رېللار د ازبکستان او تاجکستان تر پولو وغځوي.
ایران همداراز هیله لري چې د افغانستان له لارې له چین سره هم راکړه ورکړه ولري.