تاند/ د زمري ـ اسد ۲۸مه/ افغانستان کې د طالبانو د حکومت د ملي دفاع وزیر مولوي یعقوب مجاهد وايي، دوی په خپل “سیاست، اقتصاد او نظامي” برخه کې د “هیڅ چا تابع” نه دي او د متقابل تعامل او دیني او ملي ارزښتونو په پام کې نیولو سره له ټولو هیوادونو سره ښې اړیکې غواړي.
مجاهد نن “د زمري ۲۸مه” له انګرېزي ښکېلاکه د افغانستان د خپلواکۍ د بېرته اخیستو د ۱۰۷مې کالیزي په مناسبت جوړې سوې غونډې ته ویلي چې، دوی په هره برخه کې “کوټلي ګامونه” اخلي او زیاتوي چې، په راتلونکو پنځو کلونو کې به افغانستان د ډېرو “پرمختګونه” شاهد وي.
ملا یعقوب مجاهد پر هیوادوالو غږ کړی چې ټول افغانان باید “متحد” شي او د هیواد د ملي منافعو د خطر پر وړاندې ودرېږي.
نوموړي همدارنګه ویلي چې، په هوايي او ځمکني برخو کې به خپل پوځونه په ټکنالوژیکي وسایلو سمبال او د پردیو د یرغل مخنیوي ته به یې چمتو کړي
نن د “زمري میاشتې ۲۸مه” له انګرېزي ښکېلاک څخه د افغانستان د ازادۍ د بېرته اخیستلو ۱۰۷مه کلیزه ده.
افغانستان د ۱۲۹۸ لمریز کال د زمري میاشتې په همدې نېټه له انګرېزانو څخه د وخت د شاه غازي امان الله خان په واکمنۍ کې خپله خپلواکي ترلاسه کړه او په رسمي ډول یې دا ورځ د افغانستان د “خپلواکۍ” د ورځې په نوم ونوموله.