تاند ( شنبه د اسد/زمري ۲۴مه) د امریکا ولسمشر، ډونالد ټرمپ ویلي، چې د «ایران له ماتې» وروسته به ډېر ژر د هرمز تنګی د متحده ایالاتو قلمرو اعلان کړي.
ټرمپ چې په نیویارک کې د ډیویډ اېس. مک د روزنې او معلوماتو په مرکز کې خبرې کولې، وویل: «کله چې د ایران د ماتولو کار پای ته ورسوو؛ هغه هېواد چې په ډېر بد ډول د ماتېدو په حال کې دی، ډېر ژر به د هرمز تنګی د متحده ایالاتو د قلمرو په توګه اعلان کړم.»
هغه زیاته کړه: «موږ په رښتینې مانا د دې تنګي خاوندان یو، موږ د هرمز تنګي مالکیت لرو».
د ټرمپ د څرګندونو په غبرګون کې د ایران د بهرنیو چارو وزارت مرستیال، کاظم غریبآبادي ویلي، چې د اوبو دغه لار «ایراني وه، ده او پاتې به وي» او «یوازې د ایران په امر به تړل کېږي او پرانیستل کېږي».
ټرمپ له امریکایانو هم غوښتي چې د ایران د اټومي وسلو د ترلاسه کولو د مخنیوي په بدل کې د پټرول د بیو لوړېدل د یوه لګښت په توګه ومني.
هغه ویلي، امریکا به له اقتصادي پلوه پر ایران سخت ګوزار وکړي.
د فاکس نیوز د راپور له مخې، ټرمپ همداراز ویلي چې امریکا له پوځ څخه «له هغه لږ څه زیات» کار اخیستی چې ده غوښتل، خو استدلال یې کړی چې د ایران د اټومي وسلو د ترلاسه کولو د مخنیوي لپاره پر تهران فشار راوړل اړین دي.
ټرمپ دا څرګندونې یوه ورځ وروسته له هغې کوي چې د امریکا د خزانې وزیر سکاټ بسنت اعلان وکړ چې واشنګټن به له راتلونکې اوونۍ څخه د ایران پر اقتصاد بېساري اقدامات پيل کړي.
هغه ویلي: «دا اقدامات به د داسې اقتصادي انزوا ترکیب وي چې نړۍ تر دې وړاندې هېڅکله نه ده لیدلې.»