تاند (جمعه، د زمري/ اسد ۲۳ مه) په انګلستان کې ۲۰ کلن افغان بلال شینواري د ماشومانو د جنسي استثمار په تړاو په څو قضیو کې د جنسي تېري تورونه رد کړي دي.
شینواري د پنجشنبې په ورځ د نورویچ په سلطنتي محکمه کې حاضر شو. د نورفولک پولیسو په وینا، پر نوموړي د نورویچ ښار د ماشومانو د جنسي استثمار په اړه د روانې څېړنې په لړ کې تورونه لګېدلي دي.
د پولیسو د معلوماتو له مخې، په دې قضیه کې دوه قربانیان شامل دي چې د ادعا شویو پېښو پر مهال د تنکۍ ځوانۍ په عمرونو کې وو.
شینواري د ۲۰۲۲ کال د نوومبر په ۲۸مه په کوچنۍ کښتۍ کې بریتانیا ته داخل شوی او اوس د پناه غوښتونکي حیثیت لري. نوموړی په افغانستان کې زېږېدلی دی.
د نورفولک پولیسو په وینا، شینواري په روانه قضیه کې اتم کس دی چې تور پرې لګېدلی دی.
پر نوموړي له ۱۶ کلنۍ څخه د یوې کم عمره نجلۍ د جنسي تېري دوه تورونه، د ۲۰۲۳ کال د اګست او اکتوبر ترمنځ له ۱۶ کلنۍ څخه د کم عمره نجلۍ د جنسي تېري د دسیسې یو تور، او د ۲۰۲۳ کال له اګست څخه د ۲۰۲۵ کال تر مې پورې د ۱۶ کلنۍ یا تر هغې د زیات عمر لرونکې ښځې د جنسي تېري د دسیسې بل تور لګېدلی دی.
د راپور له مخې، شینواري ټول تورونه رد کړي او په توقیف کې ساتل شوی دی. د هغه محاکمه د راتلونکي کال د جنورۍ په ۱۱مه ټاکل شوې ده.
تر دې وړاندې د همدې څېړنې په تړاو اووه نور افغان نارینه، چې ټول افغان اتباع او کډوال دي، د مې په میاشت کې په مجموعي ډول د ۴۰ جرمونو په تړاو تورن شوي وو. هغوی هم ټول تورونه رد کړي او د محاکمې تر ترسره کېدو پورې په توقیف کې دي.
پولیسو له هغو کسانو چې د دې قضیې په اړه معلومات لري، غوښتي چې له دوی سره اړیکه ونیسي او د معلوماتو د وړاندې کولو پر مهال د Op Highwood26 نوم یاد کړي.